انا بعمل كل خطايا الكون

انا بعمل كل خطايا الكون
وشروري في قلبي بقت زحمة
عادي جدا ممكن في خناقه
اضرب جامد من غير رحمة
بشتم واكدب واحلف واسرق
ولساني كلماته بتحرق
ممكن اتفرج علي افلام
حتي ولو كانت اباحيه
وسجايري مابتقارق جيبي
طول مانا ماشي في الكلية
وبعرف اعاكس ...
البت الحلوة بعاكسها
والوحشة كمان مبتفرقشي
مانا اصلا مش هتجوزها
اهي كلمة بتطلع وبتمشي
وتملي لما بكون في البيت
بشتم واشخط وبعلي الصوت
مش بتعامل مع اخواتي
غير بلسان يضرب بالشلوت
عمري ماباجي ابدا يوم دوغري
دي حقيقتي اللي تملي اخفيها
واد بلطجي جدا من صغري
ويا بلاوي قلبي مخبيها
لكن لما بكون في الخدمة
قدام اطفال انا بخدمهم
بتحول يجي مليون درجة
وبلسان ربنا راح أكلمهم
الكل فاكرني خادم بصحيح
كاتكم ستين مليون وكسه
ده انا لو كنت فتلاته وسبعين
كان ربنا حولها لنكسه
ببساطة انا شيطان وسطيكم
بتلون زي مانتوا تعوزوا
عاوزه حبيب !!
ايوه هكونلك واجي اقولك
اشعار بتقولها الحبيبه
واقعه في ضيق !!
هتحول يومها لصديقك
واحاول احللك الضيقه
عاوزة نقبح !!
في ثواني ساعتها بتحول
وبمصطلحات قذره بلقح
انا حربايه ولابسه ملايه
كل شوية بكون بحكاية
عندي سهولة مش معقوله
اني اوهم غيري بضحكاية
الشر في طبعي بقى غالب
بيحولي الموجب سالــــــب
بقيت اعمل كل الممنوع
عطشان مش لاقي الينبوع
حد ياخد ايدي ويرشدني
علي شخص يقال إسمه يسوع

مايكل سامي ..

» ييالى مش عاجبك الكون ....
» أنواع من خطايا اللسان مع النصائح
» موت الناسوت هل كافي لغفران خطايا العالم؟